CEBU, Philippines - Patay nga nakit-an sa iyang pag-umangkon ang usa ka 73-anyos nga dalagang guwang ug gidudahang gilugos una pa gipatay diha sa iyang panimalay sa Sitio Lunas, Caleriohan, lungsod sa Dalaguete.
Ang namatay naila nga si Natividad Amacna nga nagpuyo ra sab sa mao’ng lugar. Matud pa ni Police Officer 3 Rodrigo Teo sa Dalaguete Police nga nahinabi sa Banat News nga katapusang nakita nga buhi si Amacna niadto pang Lunes sa hapon.
Miyerkules na sa buntag sa dihang ang pag-umangkon niini nga si James Enopia miduaw sa apohan maoy nakakaplag sa apohan sa kusina nga wala nay kinabuhi ug nanimaho na.
Sa gihimong imbestigasyon sa kapolisan, wala nay underwear ang biktima ug nagkadugo ang pribadong bahin sa lawas niini ug dunay bun-og sa dunggan niini. Gipaubos pa sa awtopsiya ang lawas niini aron pagtino kung tinuod ang ilang pagduda. (BANAT NEWS)