CEBU, Philippines - Human sa balita nga pagpanglugos sa iro niadtong Domingo lain na ‘sab nga mananap ang gikatahong gipanamastamasan sa usa ka lalaki, niining higayona usa ka baboy sud sa tangkal niini diha sa lungsod sa Tabogon.
Si Inspector Bonifacio Pareja Jr., hepe sa Tabogon Police nga nahinabi sa Banat News miingon nga nakadawat sila og taho nga dunay baboy nga gilugos diha sa Barangay Piyo sa nahisgotan nga lungsod.
Sumala pa ni Pareja nga nakadawat sila og tawag sa miaging gabii nga may usa ka tawo nga nasigpatan sulod sa alad sa baboy sa amahan sa usa ka konsehal sa maong lungsod, subay kini sa sumbong sa usa ka Litoy Tero, nga tigbantay sa motorpool sa maong lungsod. Apan sa pagkabuntag na kagahapon misibaw ang taho nga gilugos sa maong tawo ang baboy. Tungod niini, mipadala si Pareja og imbestigador aron masusi ang maong taho apan wala na sila mopadayon sa imbestigasyon tungod kay dili man moreklamo ang tag-iya sa maong piggery.
Apan bisan pa niini, naukay ang mga netizens sa Sugbo human nga dunay post sa Facebook nga nagpakita og usa ka paresan sa tsinelas nga matud pa nahibilin didto sulod sa alad sa baboy tungod sa pagkara-kara sa wa mailhing lalaki sa pagsibat.
Lain sang post sa Facebook nagkanayon nga dunay bond paper nga may gi-print nga: “Ang nagsul-ob ani nga tsinelas niadtong gabii sa October 14, 2014 maoy nitakal ug nihabal sa baboy ni Winnie.” Ang maong post nakaani og daghan comments ug shares.
Sa laing Facebook post dunay susama gihapong usa ka parisan sa tsinelas nga giingong nahibilin sa responsable sa maong hitabo.
Sayo niining semanaha, naukay ang Mandaue City human dunay usa ka lalaking hubog ang nasakpang milugos sa usa ka iro. Ang maong lalaki miinsister nga babaye ang iyang gikahilawas, apan tungod sa kaluoy, ang tag-iya sa iro wa na mokiha kaniya ug mao pay mibayad sa multa sa paghubog-hubog niini. (BANAT NEWS)