CEBU, Philippines – Patay diha-diha ang 30-anyos nga lalaki human gipusil sa tulo ka wala mailhing mamumuno sa F. Jaca Street, Upper Torre, Inayawan, Cebu City alas 12:30 kagahapon sa kadlawon.
Ang biktima naila nga si Crisenciano Ledesma Tatoy, may live-in partner ug nagpuyo sa San Roque, dakbayan sa Talisay.
Matud ni PO1 Michael Angelo Singson sa homicide section sa Cebu City Police Office nga nahinabi sa Banat News nga posibleng drugas ang hinungdan sa krimen. Kini human nakuha ang upat ka gagmay’ng pakete sa shabu sa bulsa sa biktima.
Tulo ka igo sa likod gamit ang .45 caliber pistol ang naangkon ni Tatoy hinungdan sa iyang kamatayon.
Nakuha sa crime scene ang usa ka kabhang ug usa ka buhi nga bala sa .45 cal. pistol, cellphone ug usa ka plastic nga dunay sulod nga upat ka pakete sa gituohang shabu. – /GMR) (BANAT NEWS)