CEBU, Philippines - Tungod sa peligro, plano karong paligiron na lang sa ubos ang duha ka nahibiling dagkong bato ibabaw sa bukid sa Barangay Campo 4 dakbayan sa Talisay aron di na mangahadlok ang mga tawo.
Dunay tulo ka mga dagkong bato ang nagtungtong sa bukid ug ang usa niini nahulog na ug swerteng way nangaigo,naangol o nakalas.
Si Saturnino Navecilla, barangay kapitan sa Campo 4 maoy personal nga miduaw sa buhatan sa City Disaster Risk Reduction and Management Office ug nagpahibalo sa ilang plano.
Matud ni Navecilla nga nakuyawan na g’yud sila nga mosunod og kaligid paubos ang nahibiling duha ka dagkong bato kun magsige og bunok ang kusog nga uwan.
"Ang amo lang ‘sab unta nga hangyo nga kun dunay mga balay nga mangaguba kay maligiran sa mga bato, motabang ang siyudad aron makapabarog pagbalik ang mga pamilya nga maapektohan. Kinahanglan nga amo na g’yud na nga paligiron aron makabantay ang mga tawo kaysa ang kinaiyahan gyud ang mopahulog ana. Magtinabangay ang mga opisyal sa barangay ug ang katawhan sa pagpaligid sa mga bato," matud sa kapitan.
Si Talisay City Mayor Johnny De Los Reyes nipadayag na sa iyang suporta sa maong plano ug nipasalig nga motabang sa tag-iya sa balay nga maligiran sa mga bato.
Pabakwiton ‘sab sa mga opisyal ang mga lumolupyo samtang ilaha kining buhaton. (Khacel Anne Sanchez/EIM)(BANAT NEWS)