CEBU, Philippines - Gawasnon na si Bella Ruby Santos, usa sa mga akusado nga mikidnap ug mipatay sa 6-anyos nga si Ellah Joy Pique tulo na ka tuig ang milabay.
Kini human gi-grant ni Regional Trial Court Judge Ester Veloso ang ilang motion for demurer to evidence ang hangyo sa kampo sa depensa nga ibasura ang kaso tungod sa kakuwang sa ebidensya batok ni Santos,38, nga taga Inayagan, Naga City.
Sa pagbasura sa kaso ni Santos, gipadaplin na ang hold departure order nga giisyu batok kaniya sugod niadtong Hulyo 13, 2011.
Kahinumduman nga niadtong Abril 12, 2013 gitugotan ni Veloso ang petition for bail nga gi-file ni Santos ug mi- rekomendar og P500 mil nga piyansa alang sa iyang temporaryong kagawasan. Niadtong Abril 16, 2013 nakabutang og piyansa si Santos.
Dose ka mga testigos ang gipresentar sa prosekusyon. Usa niini ang usa ka grade six nga tinun-an nga nakakita sa pagsignit kang Ellah Joy niadtong Pebrero 8, 2011 sa alas-4 sa hapon samtang sila padung na mamauli gikan sa eskuylahan.
Sa munisipyo sa Minglanilla, iyang gitudlo ang picture ni Santos nga giingong maoy iyang nakita nga nipasakay ni Ellah Joy sa sakyanan.
Nasayran nga gawas sa maong bata, duna kini kaubang igsuon ug laing kaluha nga bata nga wala i-presentar isip mga testigos.
Sa tanang witnesses nga gipresentar sa prosekusyon ang testimonya ra sa maong bata ang gihatagan og gibug-aton sa korte tungod kay siya giingong eyewitness sa maong kaso.
Pakyas usab ang prosekusyon pagpresentar sa korte ang polis nga nag-interbyu sa batang testigo aron matino kun giunsa niya pagpaagi ang pagpangutana ug pag- identify sa pictures sa akusado.
Tungod niini, gimando sa korte nga iuli ang tunga sa milyon ka pesos ni Santos nga piyansa. Si Santos dako og pasalamat sa Ginoo, sa iyang pamilya ug sa iyang abogado dihang gikahinabi sa mga tigbalita.
Si Renante Pique, amahan ni Ellah Joy nagkanayon nga nahugno sila sa pagkabati sa desisyon.
Si Santos ug si Ian Charles Griffiths nga iyang fiancée maoy gipasanginlan sa maong krimen, apan si Griffiths padayon pang gawasnon sa laing nasud.
Una nang nasayop ang Cebu Provincial Police Office pagtumbok sa lain usab manag-uyab nga sila si Karen Esdrelon ug Sven Erik Berger, usa ka Norwegian sa kamatayon ni Ellah Joy.
Si Esdrelon ug Berger gidakop sa kapulisan human gitudlo sa mga bata nga mikidnap ni Ellah Joy apan na-dismiss ang maong kaso sa piskalya pa lamang tungod kay walay igong ebidensya. (/EIM)(BANAT NEWS)