Pruning sa mga karaang kahoy sugdan na
CEBU, Philippines - Gipaabot nga karong semanaha makigtagbo ang Regional Director sa Department of Environment and Natural Resources-7 sa mga mayor sa lungsod sa San Fernando, siyudad sa Naga ug Carcar lakip na usab sa buhatan ni Gobernador Hilario Davide III.
Kini aron masugdan na sa daling panahon ang pagpahigayun og pruning sa mga kahoy sa maong lugar nga wala madayon og putol human gibabagan sa mga environmentalists.
Matud sa Public Information Officer sa DENR-7, Eddie Llamedo, nga ilahang giduso sa ulohang buhatan ang resulta sa gihimong pakisusi ni Dr. Ernesto Militante sa mga kahoy.
Gitataw hinuon ni Llamedo nga dili lang ordinaryong pruning ang ilang himuon sa mga kahoy aron gyud nga dili matumba ang mga kahoy ilabi nga sagunson ang mga pag-uwan.
Gisalikway ni Llamedo ang report nga pabor sa grupong Movement for Livable Cebu ang resulta sa gihimong eksaminasyon ni Militante.
Sigun ni Llamedo nga usa gyud ka forest pathologist si Militante hinungdan nga nasayud kini kun unsa’y angay buhaton sa mga kahoy.
Posibleng sunod semana sugdan na ang pruning ug ang ilang himuon mao ang pagpahibawo sa mga motorista nga moagi sa dapit aron dili kini makahatag og puwerhisyo. (BANAT NEWS)
- Latest
