CCPC supak sa gahum sa CCAIB

CEBU, Philippines - Gisupak sa Cebu Citizens-Press Council (CCPC) ang tipik sa ordinansa sa dakbayan sa Sugbo sa paghatag og gahum sa Cebu City Anti-Indecency Board sa pagsakmit sa mga basahon nga adunay hulagway ug estorya nga hilas.

Si Atty. Rose Verzosa sa GMA Cebu ug lider sa Cebu Media Legal Aid (CEMLA) mipadayag sa pagsupak sa probisyon.

Kini gumikan kay ang CCAIB gihatagan man og “full” ug “unconditional access” ngadto sa mga bookstore, magazine ug newspaper stand sa pagpangsakmit bisan wala’y mando sa korte. Si Konsehal Leah Japson ang miduso sa maong kausaban sa ordinansa.

Gipasabot ni Versoza nga ang maong ordinansa nakalapas sa “due process of law” diin ang balaud nagkanayon nga “no person shall be deprive of life, liberty and property without due process of law.”

Gitumbok usab ni Verzosa nga ang ordinansa wala maglakip kung unsa ang “obscene, sensual and nude” nga maoy tamdanan sa mga hingtungdan.

Giklaro ni Verzosa nga dili sila supak sa tibuok ordinansa gawas lang sa nahisgutang probisyon.

Si Konsehal Gerardo Carillo mikwestiyon kung unsang klase sa coordination ang himuon sa CCPC nga makatabang sa lakang sa CCAIB. Si Verzosa mipasabot nga ang CCPC modawat og mga reklamo gikan sa publiko nga makabasa sa mga basahon nga giingong dunay mga law-ay nga natala.

Si Atty. Pachico Seares, executive director sa CCPC, sa iyang bahin nipasabot nga ang gisupak mao ang pagkompiska sa mga materyal nga walay judicial determination.

Si Carillo ug ubang sakop sa konseho giimbitar ni Seares nga motambong sa sunod tigum sa CCPC karong Disyembre alang sa dugang pagpasabot.

“Ang kanang enforcement sa accountability must be done according to the law and the law is what the Supreme Court it is, unya karon ang Supreme Court simple kaayong gaingon nga dili ka maka-confiscate og materials deretso mo-apply una ka sa korte, simple kaayo na tumana lang na, we don’t care about the other amendments,” matud ni Seares.

Si Dr. Lucille Mercado, chairman sa CCAIB, mipasabot nga kadto lang mga printing materials nga klaro kaayong dunay mga law-ay nga natala ang ilang kompiskahon

Dugang ni Mercado nga kung maghuwat pa sila og order gikan sa korte posibleng ang mga printing material nga dunay law-ay nga natala nahurot na kini og kahalin. (BANAT NEWS)