Naligira’g bato patay

CEBU, Philippines – Patay ang usa ka lalaki human  naligiran og dakong bato gikan sa ibabaw nga bahin sa gi-quarry niya nga anapog sa Sitio Calumaran, Basak, sa Compostela niadtong Lunes sa hapon.

Si Police Officer 3 Michael Magallon, imbestigador sa Compostela Police Station miila sa namatay nga mao si Emmanuel Pareja Parcon, 50, taga Chicosville  Subdivision, Barangay Poblacion sa nahisgotang lungsod.

Matud pa ni Magallon nga ang namatay  maoy nanag-iya sa maong luna nga iyang gikubkob nga sagol paghimo og hollowblocks.

Sumala pa ni Magallon nga nagbarog ang biktima sa tungod sa gikubkob dihang kalit lang midahili ang yuta ug miuban usab pagligid ang dakong bato gikan sa ibabaw ug naigo siya niini.

Dugang pa ni Magallon nga naputol ang tuong tiil sa biktima ug nakasinati usab og grabeng kadaut ang tuong bahin sa lawas nga maoy naigo sa miligid nga bato nga maoy nakaingon sa iyang hinanaling kamatayon.

Si Alvie Ramirez sa mayor’s office sa lungsod sa Compostela nga nahinabi sa Banat News miingon nga sagad sa mga nag-quarry sa ilang lungsod nagkuha gayod og permit apan ila pang susihon kung may permit ang biktima.

Kinahanglang dunay barangay resolution nga ikapakita ang buot magkubkob sa anapog aron hatagan kini og permit sa mayor ug Provincial Environment and Natural Resources Office (PENRO).

Sa nasayran sa Banat News sa PENRO nga daghan sa mga  ginagmay nga quarry operations sa kalungsoran.

Si Engineer Mario Bacus sa  Mines and Geosciences Bureau (MGB) sa Department of Environment and Natural Resources (DENR) 7 nga nahinabi sa Banat News miingon nga ang gjnagmay nga mga quarry operation sa PENRO kuhaon ang permits. -/EIM) (BANAT NEWS)