CEBU, Philippines – Ang kadagkoan sa Department of Public Works and Highways (DPWH) nihangyo sa kagamhanan sa Lapu-Lapu City nga hatagan sila og lugway sa paghuman sa road construction sa Barangay Basak ug Barangay Marigondon hangtod sa Nobiyembre.
Si City Engineer Allan Pedrigal miingon nga nihangyo og extension ang kadagkoan sa DPWH kaniadto’ng Huwebes tungod kay kanunay’ng nalangan ang ilang pagtrabaho tungod sa subsob nga pag-uwan.
Matud ni Pedrigal nga ang Venray Construction nga maoy gitugyanan pagpanindot sa karsada gikan sa Barangay Basak paingon sa Marigondon mi-target unta nga humanon ang pagsemento sa miaging semana apan wala nila matuman.
Dagha’ng pasahero ang nireklamo ilabi na ang mga drayber og traysikol ug PUJ tungod sa kalisod sa pag-agi sa mao nga dapit.
Sa iyang State of the City Address (SOCA), si Mayor Paz Radaza misaad nga mahuman na ang pag-ayo sa karsada sa buwan sa Septiyembre. (BANAT NEWS)