CEBU, Philippines – Daghang mga empleyado ug mga pribadong indibidwal nga aduna’y transakyon sa Talisay City Hall ang nangreklamo tungod sa pagsira sa mga pansayan sulod sa city hall.
Mitiyabaw karon ang mga empleyado nga nadestino sa maong edipisyo gikan alas-8 sa buntag hangtod sa alas-5 sa hapon tungod kay way kasilyas, ang uban kanila mouli sa ilaha aron mangasilyas.
Si Talisay City Mayor Johnny De Los Reyes miingon nga gipasira una ang mga pansayan tungod kay guba ang mga inidoro niini tungod kay magsige kini og agas ug kalas na kaayo sa tubig.
Iyang giklaro nga dili tanang comfort rooms ang gisirad-an ug duna pay uban nga magamit pa gihapon.
Apan duha na kini ka semana nga gireklamo sa mga empleyado ug ang mga kasilyas nga magamit pa dili paigo alang sa tanang empleyado nga gustong mogamit niini. Si De Los Reyes miingon nga iya nang gihatagan og order ang engineering office mahitungod niini.
Si Konsehal Richard Aznar, pangulo sa Committee on Health mimando na sa engineering office sa pagsusi sa problema. Apan base sa nakuhang impormasyon sa Banat News naguba ang bomba sa tubig sa city hall tungod kay wala mapaayo. -EIM) (BANAT NEWS)