Natulog giulo pagpusil patay

CEBU, Philippines – Giulo sa pagpusil sa wala mailhing suspetsado ang usa ka lalaki samtang natulog sa ilang panimalay sa sitio Eskwelahan, Basak, dakbayan sa Lapu-Lapu niadtong Sabado sa hapon.

Matud ni PO3 Lydo Pinos, imbestigador sa Lapu-Lapu City Police Office- Homicide Section, ang biktima mao si Allan Obregon, 42-anyos, residente sa maong lugar. Sa wala pa nahitabo ang pagpamusil alas 2:30 sa hapon, natulog si Obregon sa kuwarto ug kalit nga nisulod sa panimalay ang wala mailhing tawo nga namusil tumong sa ulo sa biktima.

Ang inahan sa biktima samtang nanglaba nakadungog sa buto gikan sa balay sa iyang igsuon.

Nakuyawan ug daling nidagan ang inahan padulong sa ilang balay ug naabtan niya si Obregon nga nagkadugo.

Gidala sa Lapu-Lapu City District Hospital ang biktima ug gibalhin sa Vicente Sotto Memorial Medical Center apan human sa pipila ka oras nakabsan gyud sa kinabuhi ang biktima. -/GMR) (BANAT NEWS)