Nasunogan sa Bo. Luz mitiyabaw

CEBU, Philippines - Kuwang ra ang hinabang nga nadawat sa mga biktima sa sunog sa Bario Luz bisan pa sa kwarta nga hinabang gikan sa siyudad.

Kini maoy nasayran sa Banat News atol sa pagduaw sa mga nasunogan diha sa Bario Luz Night High School ug sa sports complex diin temporaryong gipahiluna ang 200 ka pamilya sa maong barangay.

Ang siyudad mitunol na og tag P10 mil niadtong hingpit nga naugdaw ang balay samtang P5 mil sa partially burned.

Apan nasayran nga bisan pa man sa hinabang nga gihatag sa siyudad ug barangay ngadto kanila ilang gihulagway nga kuwang gihapon aron ipalit og housing materials aron makatukod og balik sa ilang panimalay.

Sumala pa nila nga dili maayo ang ilang kahimtang sa complex ilabi na kun mag-uwan hinungdan nga daghan kanila ang nagkasakit-sakit sama sa ubo ug subaw sa mga bata ug tiguwang.

Samtang si Nenita Dimco kinsa naangol atol sa panghitabo human nasamad ug natagak sa hagdanan tungod sa karatol, nanawagan nga unta tabangan siya aron ipatan-aw ang iyang kilid ilabi na nga maglisod siya og bangon ug di pa usab makalakaw.

Nasayran nga gawas sa pinansyal nga tabang nga gihatag sa siyudad dunay nagkalain-laing grupo usab ang mipaabot og hinabang sa mga apektadong residente ug mi-donate og bugas nga gipang-apod-apod sa mga apektadong residente. (BANAT NEWS)