CEBU, Philippines – Ang pagbaligya sa luna diha dapit sa San Pedro Calungsod Templete site sa South Road Property (SRP) makaapekto kini sa joint ventures sa SM ug Filinvest Land Incorporated matud ni kanhi mayor ug kongresista Tomas Osmeña.
Matud ni Osmeña nga kung ang makapalit sa maong luna wala’y itukod ang makuha sa gobiyerno niini mao lang ang buhis sa luna.
Apan kung magtukod usab kini og condominium mahimo kining kompetensiya sa SM makaapekto kini sa joint ventures sa SM ug Filinvest.
Gipasabot ni Osmeña nga kaniadto ang SM mipalit og 34 ektaryang luna diha sa SRP nga nagkantidad og P2.7 bilyones. Si Osmeña milakbit sa argumento ni kanhi Cebu City councilor Joey Daluz nga kung magbaligya og luna ang siyudad makakolekta og buhis tungod kay kinahanglan man nga mobayad og buhis ang nanag-iya niini.
Gipasabot ni Osmeña nga dihang mipalit og luna ang SM gipangutana niya kini kung unsay buhaton sa maong luna.
Ang SM nagtukod og P8 bilyones nga mall diha sa luna karon ug matud ni Osmeña nga dili lang P3 bilyones ang bayaran nga buhis sa SM lakip na ang P8 bilyones.
Gawas niini sulod sa maong mall langkoban kini sa 40 ektarya nga mga tindahan diin matag usa niini magpabayad og business permit ug laing abot usab unya kini sa siyudad.
Matud ni Osmeña nga mosaka usab ang value sa tibuok 300 ektaryang luna diha sa SRP tungod sa gitukod nga mall.
Matud usab sa kanhi kongresista nga ang iyang baroganan kaniadto pangutan-on niya ang buyer sa luna kung unsay himuon niini aron ilang ma-screen.
Subay niini, si Osmeña nagkanayon nga ang Filinvest kinsa miapil sa joint ventures sa siyudad mohatag og 10 porsiyento nga bahin sa matag usa ka metro kwadrado.
Ang Filinvest wala tugoting makabaligya og luna ug condominiums lang ang gitugot nila nga mabaligya. -/EIM) (BANAT NEWS)