CEBU, Philippines - Pasakaan ang ihatag nga honorarium sa mga magtutudlo sa Alternative Learning System (ALS) program sa dakbayan sa Toledo.
Kini human gilagdaan na ni Toledo City Mayor Sonny Osmeña ang gibana-banang P5 milyones nga pondo alang sa ALS program. Gikompirmar ni Hermelina Bendoy, ALS program supervisor sa Toledo, ang maong kalamboan.
Gitinguha nga moabot sa P7,500 ang honorarium matag buwan alang sa mga literacy instructor sama sa instructional manager sa skills training.
Subay niini mo-hire usab og dugang mga magtutudlo ang ALS.
Nasayran nga sa pagkakaron upat lang ang magtutudlo sa ALS skill training center sa siyudad.
Gawas sa dugang magtutudlo mopalit usab og dugang mga ekipo o makinarya alang sa skills training.
Ang maong pondo kuhaon gikan sa supplemental budget sa Toledo.
Dugang niini, daghan na nga taga Toledo ang nakahuman sa ALS skills training program kinsa nakatrabaho na ug ang uban toa na sa gawas sa nasud.
Nagkadaghan usab ang nakahuman diin sukad niadtong tuig 2001 adunay 50 ngadto sa 60 lang apan sa pagkakaron, kapin sa 200 ka trainees na sa ALS ang nakahuman ug nahatagan sa kahigayunan nga makatrabaho. (BANAT NEWS)