Koreana “nangawat” OG cellphone

CEBU, Philippines -  Koreana gidakop sa kapolisan sa miaging hapon human gipasanginlan nga nangawat og cellphone sa ABC president sa Madridejos sulod sa usa ka gym sa Barangay Apas niadtong Huwebes sa gabii.

Ang nasikop naila nga si Kim Yeon Hui, 20, nga empleyado sa usa ka English as a Second Language (ESL) nga eskwelahan sa Barangay Apas.

Samtang ang mireklamo mao si Mancilang Barangay Kapitan Jay Dela Fuente, 22, ABC President sa lungsod sa Madridejos. 

Base sa imbestigasyon sa Theft and Robbery Section sa Cebu City Police Office nga ang biktima mi-report sa kapolisan nga ang iyang duha ka cellphone  nga mobalor og P85 mil gikuha sa wala mailhing tawo sulod sa usa ka ilado nga gym.

Base sa imbestigasyon, nakita sa closed circuit television (CCTV) camera sa maong establisamento  ang Koreana nga naglingkod sulod sa maong gym ug naglantaw sa cellphone tungod kay gibutang ra man kini sa salog sa biktima.

Pipila ka minutos ang milabay nakuha sa CCTV ang pagkuha sa suspek sa duha ka cellphone nga kolor itom ug puti.

Nakita ‘sab sa CCTV nga ang maong suspek mi turn-over sa puti nga cellphone sa counter sa maong fitness gym apan duna kini gibitbit nga itom nga butang sa pikas niya nga kamot.

Na-trace sa kapolisan ang suspek ug natultolan ang gipuy-an niini. Apan matud pa ni Police Officer Three Jodan Batucan nga gihimakak sa suspek ang maong salaod apan desidido ang biktima pagpasaka og kaso batok niini.

Kasamtangan karon nga gitanggong sa Cebu City Police Office stockade ang maong Koreana.  (BANAT NEWS)