CEBU, Philippines - Nabanhaw ang tinguhang pag-umol sa sisterhood tali sa mga dakbayan sa Talisay ug Mandaue aron mapadayon ang pagtinabangay sa duha ka lokal nga kagamhanan.
Nitumaw ang tinguha ni Talisay City Mayor Johnny De los Reyes human gipahuwam ni Mandaue City Mayor Jonas Cortes ang vacuum truck aron paghabwa sa kanal kilid sa Tabunok Public Market nga dugay na kaayo’ng gireklamo.
Abangan unta sa dakbayan sa Talisay ang maong ekipo apan giingong nagdumili si Cortes kinsa nagpadala pa gyud og mga tawo nga motabang paglimpyo sa lugar.
Nunot niini si De los Reyes mosugyot ngadto sa konseho nga himoong sister city ang Mandaue.
Ang maong plano una na nga gipadayag ni Cortes sa niaging tuig human nibisita si De los Reyes sa Mandaue aron makisayod sa pagdumala sa merkado publiko. (Khacel Anne D. Sanchez/GMR)(BANAT NEWS)