CEBU, Philippines - Gisikop sa kapolisan sa lungsod sa Argao ang tulo ka magsuong babaye human nakuha sa video sa close circuit television (CCTV) camera nilungkab sa usa ka gas station sa maong lungsod.
Pasado alas dos sa kadlawon kagahapon, ang Petron Gas Station sa eskina Albarasin ug Poblacion, Argao ang gilungkab. Naila ang magsuon nga sila si Lovely Comaling, 25, Marry Ann Comaling, 21 ug Nerisa Comaling, 19, nga parehong nagpuyo sa Langtad, Argao ug mga mamasurahay.
Matud ni PO2 Paulino Sanchez sa Argao Police nga nagpakitabang sa ilang buhatan ang tag-iya sa maong gas station nga si Edwin Figues nga taga M.J Cuenco, Argao human iyang nabantayan alas 6 sa buntag nga guba na ang pultahan sa ilang establesamento.
Sa gihimong pakisusi nahanaw na ang P10,000 ug usa ka cellphone.
Ang CCTV camera ang nakatabang sa pag-ila sa nilungkab.
Sa gihimong follow-up operation sa kapolisan, nasikop ang tulo ka magsuon sulod sa usa ka junkshop nga mibaligya sa ilang nakuha nga mga plastic sa pamasura.
Giangkon hinuon sa tulo ang krimen pinaagi sa screw driver nga ilang gigamit sa pag-abli sa pultahan.
Gibutyag ni Sanchez nga lima na ka higayun nga nasikop si Lovely sa kasong pagpangawat, ikaduha na si Marry Ann ug una pa lang si Nerisa.
Sa P10,000 nga nakuha, P3,570 na lang ang nabawi sa kapolisan.
Sumala pa ni Sanchez nga posibleng gumikan sa kalisud ang nakatukmod sa magsuon nga mohimo sa maong krimen bisan pa man sila nahibawo nga mapriso. (Jojo C. Ugdol/GMR)
(BANAT NEWS)