CEBU, Philippines - Dili pabor si Cebu 4th District Representative Benhur Salimbangon nga ihinayon ang Sangguniang Kabataan (SK) Elections sa Pebrero sa sunod tuig.
Alang sa kongresista nga gikinahanglan pa nga amendahan ang balaod alang sa pagreporma sa SK. Matud ni Salimbangon, nasagulan na ang SK sa mga panglingla diha sa politika ug siya midugang nga kadaghanan sa mga nagparehistro giingong nag-apas na sa makuhang bayad sa ilang boto.
Buot usab ni Salimbangon nga usbon sa mga batan-ong lider ang ilang panggobiyerno ug di lang kutob sa pagmugna og mga pa-liga ug motunga lang kun ihatag na ang honorarium. Matud ni Salimbangon, ang kabataan unta manginlabot usab sa mga isyu sa ilang barangay nga gituki sa ilang mga opisyales. Buot ni Salimbangon nga idungan na sa regular elections ang SK ug dili lang ang kabataan maoy pabotaron kondili, lakip ang mga hamtong nga botante.
Sa pagkakaron, nag-ungot pa sa Kongreso ang balaudnon nga nagtinguhang mareporma ang SK. Sa laing bahin, kadaghanan sa mga kabatan-onan wala magtagad sa ilang registration matud pa ni Efren Arnejo Jr. Election Assistant sa Talisay City kinsa nahinabi sa Banat News. Sa partial nga ihap sa Comelec Talisay City, aduna’y 746 ang bag-ong nagparehistro gikan sa pag-abli niini hangtod sa kataposang adlaw sa special registration niadtong adlaw nga Lunes. Sa miaging tuig nitala ang maong buhatan og 7,861 ka mga botante apan 3,183 niini lapas na karon og dise-otso anyos. (BANAT NEWS)