Duha nakuryentihan patay

CEBU, Philippines - Duha ka mga tawo ang nakuryentihan sa ilang mga trabahoan sa managlahing dapit sa dakbayan sa Lapu-Lapu sa miaging Lunes sa hapon ug gabii.

Ang pool attendant nga si Axel Augusto,36, nagtrabaho sa usa ka resort sa Punta Engaño sa maong dakbayan ang nakuryentihan Lunes sa gabii. Sumala pa sakop sa Transorient Manpower Services sa dakbayan sa Mandaue si Augusto.

Si Lenie Almoroto, 30, kapuyo ni Augusto nga nahinabi sa Banat News kagahapon buot masayod kung unsay nahitabo nga nakuryentihan man ang amahan sa ilang upat ka mga anak diha sa trabahoan.

Matud niya nakadawat siya og tawag alas-6 na sa buntag kagahapon gikan sa resort nga nagpahibalo nga nakuryentihan ang iyahang kapuyo samtang naglimpyo sa pool ug mipilit ang lawas niini sa vacuum.

Si Augusto magsugod og trabaho gikan sa alas- 11 sa gabii hangtud sa alas -7 sa kabuntagon.  Nangayo siya karon og tabang kung unsaon niya pagbuhi ang ilang mga anak nga wala man siyay trabaho.

Ang agency nga gitrabahoan ni Augusto gisuwayan og kuha og habig apan walay motubag sa tawag. Ang Lapu-Lapu City Police Office – Homicide Section miingon nga wala sila pahibaw-a sa resort ug sa agency nga dunay namatay nga trabahante sa maong resort. Gimandoan na ni Police Senior Superintendent Armando Radoc, officer in charge sa LCPO ang Homicide Section paghimo og imbestigasyon aron manubag ang responsable sa pagkamatay sa pool attendant. Samtang usa ka construction worker sa Barangay Gun-ob ang nakuryentihan samtang gibira ang galvanized gutter sa usa ka construction building sa miaging Lunes sa hapon. Si PO3 John Carlo Jocutan sa Homicide section ang nagkanayon nga nahitabo  ang insidente ala -una sa hapon sa East Ampalaya Village.  Ang biktima mao si Jonel Presbetero, 30 , nagpuyo sa lungsod sa Sogod.

Base sa imbestigasyon ni Jocutan, kuyog sa biktima ang iyahang bayaw nga si Randy Coma, 38, sa gihimong building aron itaod ang galvanize gutter. Apan dihang gibitad ni Presbetero  ang mao nga gutter aksidente kining naigo sa electrical main line ug nakuryentihan.

Ang biktima daling gidala sa Lapu-lapu City District Hospital apan gideklarar kini nga dead on arrival. (BANAT NEWS)