CEBU, Philippines – Usa lang ka tawo nga gituohang taga Pit-os o Talamban, Cebu City maoy gidebwenas nga nakadaog sa P294 milyones nga 6/55 Grand Lotto Jackpot niadtong adlaw nga Sabado.
Sumala pa ni Glenn Jesus Rada, sa Philippine Charity Sweepstakes Office-Central Visayas, ang maong tawo anha mipalit sa iyang winning lotto ticket sa Pit-os lotto outlet sa Sitio Lower Sentro.
Ang winning number combination 08-42-35-11-17-22 nagtangag og P294,602,336 nga ganti. Sumala pa ni Rada nga gikahinabi sa Banat News, ang maong tawo atoa na sa kaulohan aron i-claim ang iyang premyo.
Wala hinuon masayod si Rada kung lalaki o babaye ug kung taga diha ba sa Pit-os ang maong nadugang nga milyonaryo dinhi sa Pilipinas.
Sumala pa sa report sa Philippine Star, ang Philippine Charity Sweepstakes Office (PCSO) acting chairman nga si Jose Ferdinand Rojas miingon nga gawas sa maong jackpot winner, dunay 105 ka uban pang players ang nakadaog og tag P44,300 kada usa tungod kay lima sa ilang napalit nga numero ang nigawas.
Si Rada sa iyang bahin miingon nga kinahanglang pirmahan daan ang winning ticket aron di mailog sa uban tungod kay mao kini ang labing importanteng dad-on sa winner sa pag-claim sa iyang premyo.
Kinahanglan readable ang bar codes ug mabasa pa ang mga nakasulat niini ug magdala usab og duha ka valid IDs.
Matud pa ni Rada, mao pa kini ang labing dako nga premyong gidag-an dinhi sa Central Visayas gikan sa PCSO. -/EIM) (BANAT NEWS)