CEBU, Philippines - Ang bag-ohay pang nauli nga mga tropang Filipino gikan sa Golan Heights mao karon ang gitahasan aron maoy mobantay sa pagbisita ni Pope Francis dinhi sa Pilipinas karong bulan sa Enero sa sunod tuig, sumala pa sa report sa Interaksyon.
Kahinumdoman nga nakuha sa mga Filipino nga sundalo ang atensyon sa kalibotan dihang ilang gipakita ang kaisog ug kalidad sa mga sundalo sa Pilipinas tungatunga hulga gikan sa mas kusog ug mas dakong pwersa sa mga rebeldeng Al Nusra Fraton sa Syria diha sa Golan Heights usa ka buwan na ang nakalabay.
Ang mga sakop sa 7th Philippine Contingent sa AFP Peacekeeping Operations Center ug sa gikatakda palang nga i-deploy nga 8th Contingent gimandoan ni Chief of Staff General Gregorio Pio Catapang nga mutabang sa pagbantay kang Pope Francis.
Usa karon ka dakong hagit sa security forces sa Pilipinas, lakip na sa Philippine National Police ang pagbantay sa Santo Papa kinsa nabantog usab nga maayong mulighot gikan sa iyang mga security ug dili ganahan og daghang guwardiya.
Dugang hagit usab sa mga awtoridad ang report nga si Pope Francis nag-una sa listahan sa patyunon sa Islamic State of Iraq and Syria (ISIS) tungod sa pagsaway sa lider sa Simbahang Romano Katoliko sa ilang kabangis ngadto sa mga inosenteng sibilyan, Kristiyano ug mga Muslim sa nasud sa Syria ug Iraq ning nanglabay nga mga bulan. (BANAT NEWS)