Kapitan napusilan sa pag-umangkon
CEBU, Philippines - Nalandig sa tambalanan ang kapitan sa Barangay Amatugan, lungsod sa Tuburan, human kini gipusil og sumpak sa iya ra ‘sab nga pag-umangkon niadtong Sabado.
Ang biktima naila nga si Braulio Umandac, 54, kapitan sa maong barangay, samtang ang suspek naila nga si Joseph Bayo Umandac, 21.
Matud pa ni PO1 Julius Edaño sa Tuburan Police nga nahinabi sa Banat News, hubog ang suspek ug nagmaoy ug nagsige’g pabuto og revolver atubangan sa mga estambay sa ilang lugar bisan adunay barangay tanod, hinungdan nga kini gidis-armahan ug gisikop.
Miabot ang biktima ug gitambagan ang suspek nga mokalma lang apan inay maminaw mikuha kini sa lain niya nga dalang armas nga iyang gibutang sa iyang likod ug nagpabuto sa ubos ug naigo sa paa ang kapitan.
Dali gilayon nga gidala sa Tuburan District Hospital ang biktima samtang naaresto ‘sab sa mga residente sa lugar ang suspek ug gi-turnover sa mga miresponde nga kapulisan.
Sa pagkutlo ning balita gitanggong na sa Tuburan Police detention cell ang suspetsado samtang ila pa nga gipaabot kung kini mapasaylo ba sa iyang nahimo nga salaod og pasakaan ba og tukmang kaso. (BANAT NEWS)
- Latest
