CEBU, Philippines - Apil sa makapahimulos sa benepisyo sa “solo parent” ang kalalakin-an sumala pa ni Konsehal Gerardo Carillo sa dakbayan sa Sugbo.
Matud ni Carillo nga ang solo parent mao kadtong mga inahan, amahan ug bisan apohan nga may giatiman nga bata o anak nga wala’y kaabag.
Ang Department of Social Welfare and Services (DSWS) maoy mo-validate sa mga nagparehistro kung kwalipikado ang usa ka tawo.
Ang katin-awan giluwatan human ang ubang kabarangayan mipahibawo sa ilang mga molupyo nga ang solo parent alang lang sa mga babaye.
Gipasabot ni Carillo nga ang solo parent dili lang alang sa kababayen-an kun dili apil niini ang mga lalaki.
Si Carillo kinsa chairman sa committee on social services sa konseho sa dakbayan sa Sugbo nagkanayon nga daghang solo parents ang wala masayud sa ubang benipisyo sama sa pito ka adlaw nga leave kini subay sa balaud.
Ang kabarangayan giawhag nga mopahigayon og pagpangrehistro sa mga solo parents sa ilang lugar nga gisugdan sa buwan sa Septiyembre hangtud Oktubre 30.
Matud ni Carillo nga kadtong mga solo parent nga wala makaparehistro dili mahatagan og hinabang gikan sa siyudad.
Gibutyag ni Carillo nga sa milabay’ng semana, pito na ka barangay ang ilang nabisita diin sila nagpahigayun og orientation alang sa solo parent.
Lakip sa maong mga barangay mao ang Pahina San Nicolas ug Sawang Calero.
Ang kagamhanan sa siyudad mohatag og P5,000 nga pinansiyal nga hinabang sa solo parent.
Gawas niini ang solo parent gitugutan usab nga maka-loan og P5 mil ngadto sa P10 mil alang sa livelihood.
Ang siyudad migahin og P10 milyones nga budget alang sa financial assistance sa solo parents ug P20 milyones alang sa loan package sa livelihood program.
Ang makapahimulos sa maong mga benepisyo kadtong mga solo parents nga botante sa dakbayan sa Sugbo diin ang kita niini ubos sa P60 mil sa usa ka tuig.
Sila si Konsehal Noel Wenceslao ug Mary Ann Delos Santos ang gisangonan sa pagpahigayon og orientation sa amihanang bahin sa Sugbo samtang sila si Carillo ug Konsehal Hanz Abella ang nagpahigayon og orientation sa habagatan. (BANAT NEWS)