Korean Day patambungan sa publiko

CEBU, Philippines - Ipahigayun karong Oktobre 1 hangtud 5 ang Korean Day sa Cebu Korean Association sa SM City, Cebu. Ang mga opisyal sa CKA nga sila si David Yoon, operation manager; ug ang tulo ka vice presidents nga sila si Paul Kim, Hyun Jung Sun ug Joseph Shin uban sa ilang event staff nga si Nikki Charmaine Reambonza ang miawhag sa publiko sa pagtambong sa mao nilang kalihukan.

Ang mga kalihukan maglangkub sa Korean Food Festival, Korean Culture Exhibit, Korean Film Festival, presentasyon sa Cebu K-Pop Star 2014 winners, Manila K-Pop contest winners ug Korean traditional performance.

Ang nahisgutang mga opisyal mibutyag nga ika-upat na nila ka higayon ang pagpahigayon sa Korean Day diin nagsugod sila niadtong tuig 2011.

Ang unang Korean Day napahigayon sa Ayala Center, Cebu.

Gilaumang 2,000 ngadto sa 3,000 ka Koreans ang moabot sa Sugbo alang sa maong kasaulugan.

Gibutyag sa mga opisyal nga gibanabanang 20,000 ngadto sa 30,000 ka Koreans ang nagpuyo karon sa Sugbo. Matud sa grupo nga mihangop sila sa komunidad ug gobiyerno sa Sugbo nga mihatag og maayong pagtagad kanila.

Giklaro sa grupo nga ang mga Sugbuanon gilauman usab nilang motambong sa mao nilang kalihukan diin buot nilang masabtan ang ilang kultura. (Brenda D. Batuto/GMR)(BANAT NEWS)