CEBU, Philippines - Pito ka mga tawo ang naangol, lakip na sa drayber sa usa ka dumptruck nga nahulog sa usa ka pangpang sa Sitio Agotayan, Barangay Lawaan, Danao City, sa miaging adlaw human nga nawad-an kini og brake.
Ang mga naangol naila nga sila si Marry Ann Camanse, 33, taga barangay Bayabas, Clairah Agsoy,4, taga Pili, Danao, Vicky Malbago, 27, taga Tubigon Santican, Luigi Tee, 8, Portland Danao, Stephen Tautjo, 2, taga Dungo-an, Danao, Feliciano Tautjo, 64, taga Pili, Danao ug Remedios Tautjo, 64, taga Pili Danao City. Ang maong dumptruck gipanag- iya sa Danao City Government nga gimaneho ni Felipe Pepito Jr., 37.
Matud pa ni PO1 Romel Costa traffic investigator sa dakbayan sa Danao nga nahinabi sa Banat News, gikan sa Poblacion ang maong dumptruck ug paingon sa barangay Pili ug mi-hitch ride ang mga pasahero niini. Pag-abot sa Sitio Agotayan, Lawaan, gikatahong na-flat ang ligid sa atubangan sa maong dumptruck ug giilisan sa drayber, apan dihang gipaandar na unta, wala kini moandar samtang hinay-hinay nga midagan sa dulhogon nga dalan.
Dali unta nga mi-brake ang drayber apan nibasiyo ang brake hinungdan nga kini gibangga na lang sa drayber sa stock pile sa kilid sa kalsada apan nalahos kini og kahulog sa pangpang nga duna’y gitas-on nga 45 metros. (Jojo C. Ugdol/EIM)(BANAT NEWS)