Bata napunggit sa awto sa Indian patay

CEBU, Philippines - Patay ang usa ka 2-anyos nga batang lalaki, human nabanggaan sa usa ka Mitsubishi pickup nga gimaneho sa usa ka Indian diha sa National Highway, Sitio Talangan, Barangay Sto. Niño, Malabuyoc niadtong Miyerkules sa hapon.

Ang biktima naila nga si Luie Bitong Benlot, nagpuyo sa maong lugar, samtang ang langyaw nga nakadasmag kaniya naila nga si Ajaib Singh, 35, nagpuyo sa Poblacion , Samboan.

Sumala pa sa deputy chief sa Malabuyoc Police Station nga si SPO4 Faustino Filipinas nga nahinabi sa Banat News, gikan sa Samboan ang maong langyaw ug paingon na unta kini sa lungsod sa Malabuyoc apan pag-abot niini sa maong lugar kalit lang mitabok ang maong bata hinungdan nga kini nabanggaan.

Dali pa unta  gidala sa MJ Cuenco Memorial Hospital sa maong lungsod ang biktima apan nakabsan gayud kini sa iyang kinabuhi. Kagahapong adlawa matud pa ni SPO4 Filipinas nga ila sab nga gidala sa hospital ang maong langyaw human kini nagka “hypertension” sulod sa bilanggoan.

Giingong nagsabot na ang pamilya sa bata ug sa langyaw, apan gipasabot ni Filipinas nga ilaha gihapon nga ipasaka ang kasong reckless driving resulting to homicide ug bahala na silang magsabot sa piskalya.  (BANAT NEWS)