101-anyos napaig

CEBU, Philippines - Patay ang usa ka 101-anyos nga lola human kini naapil pagkasunog sa iyang gipuy-an nga balay kagahapon sa buntag  sa Sitio Paradise Dos, Barangay Kasambagan, Cebu City.

Ang maong lola nga si Juanita Arcaya nga posibling usa sa mga labing  tigulang nga nagpuyo dinhi sa dakbayan sa Sugbo.

Alas 10:12 nadawat sa kabomberohan ang  alarma sa maong sunog nga nakontrolar paglabay og diyes minutos.

Matud pa sa apo sa biktima nga si Sylvia Sim nga wala na gayud nakagawas sa iyang lawak ang ilang lola sa dihang miulbo ang kalayo nga gituohan sab nga didto nagsugod sa iyang lawak.

Sumala pa ni Sim nga manigarilyo ang iyang apohan ug kini maoy nakitang posibleng hinungdan sa sunog.

“Ablihan unta namo ang iyang room, pero dako na kaayo ang kalayo, baga kaayo ang aso,” matud pa ni Sim. Gikatahong makabarog pa ang maong lola apan hinay nang molihok. Si City Fire Marshall Rogelio Bongabong miingon nga ilang gidudahan nga ang  napasagdang sigarilyo ni Arcaya ang nakaingon sa sunog.

Ang usa sa mga anak sa biktima nga si Leonora Palompon nagkanayon ‘sab nga diha siya sa sulod sa balay sa dihang nahitabo ang sunog.

Matud pa ni Palompon nga iya pa unta nga gisulayan og abri ang lawak sa iyang inahan apan baga na kaayo ang aso ug dako nga kalayo ang misugat kaniya hinungdan nga wala kini nakasulod ug nakakuha sa iyang inahan.

Ang usa sa mga imbestigador sa Homicide Section sa Cebu City Police Office nga si PO1 Michael Angelo Singson mitug-an nga didto sa kilid sa kwarto ilang nakita ang sunog nga lawas ni Arcaya.

Ang mga silingan ni Arcaya mipadayag sab sa ilang kasubo sa maong hitabo.

 “Bisan tiguwang na  siya, pero amo jud nang gitahod diri sa amoa,” sigun pa sa iyang silingan. Gibanabana nga P200 mil ang danyos sa maong sunog.  (BANAT NEWS)