CEBU, Philippines - Giawhag ni Konsehal Alvin Dizon, chairman sa committee on youth sa konseho sa dakbayan sa Sugbo, ang mga batan-on nga moparehistro alang sa umaabot eleksiyon sa Sangguniang Kabataan karong Pebrero 21, 2015.
Kini human gipahibawo si Dizon sa Commission on Elections nga hinay kaayo ang ilang pagpangrehistro ug gamay lang ang gidaghanon sa nagparehistro tungod kay tingklase man.
Ang pagparehistro sa kabataan alang sa SK election nagsugod niadtong Septiyembre 20 ug matapos kini karong Septiyembre 29.
Ang pwedeng makaparehistro aron makabotar sa SK election mao kadtong nagpanuigon gikan sa 15 ngadto sa 17-anyos.
Matud ni Dizon nga ang Comelec naglaum nga karong Sabado ug Domingo ubay-ubay nga kabataan ang magparehistro.
Subay niini, si Mikay Dumaboc sa Akbayan Youth of First Time Voters Project Network Cebu, miawhag sa kabataan nga magparehistro sa labing duol nga buhatan sa Comelec.
Matud ni Domaboc nga kadtong nakaparehistro niadtong Hulyo pwede na nga dili magparehistro.
Apan kadtong narehistro nga moabot na sa 18-anyos unya sa Pebrero 21, 2015 ang dili na makabotar.
Ang mga lider sa lain-laing grupo sa youth naghangyo usab sa Comelec sa paglugway sa pagpangrehistro hangtud sa semestral break karong Oktobre aron ang kabataan mahatagan gyud og kahigayunan sa pagparehistro.
Si Dumaboc mihangyo usab sa mga batan-on nga unta mogahin og bisan gamay lang sa ilang oras aron kini magparehistro.
Laing lider sa youth nga si Carlo Cabatingan sa Cebu City Youth Development Commission nag-awhag sa kabarangayan sa pagtabang sa kabatan-onan sa pagpagamit og masakyan aron kini makaparehistro ngadto sa Comelec.
Si Jum-Jum Ouano sa Bayan Youth miawhag usab sa mga batan-on nga magparehistro aron ma-practice niini ang ilang katungod nga gihatag sa gobiyerno sa pagbotar.
Ang magparehistro magdala lang og identification card o dokumento sama sa birth certificate nga magmatuod sa pangalan ug edad sa magparehistro.
Sunod mao ang pagpirma sa application form diin ang maong form pwede makuha sa website sa Comelec nga www.comelec.gov.ph. (BANAT NEWS)