CEBU, Philippines - Gikatakda karong Septiyembre 30 ang pagpahigayun sa bidding sa Phase I sa tukuron nga bag-ong building sa Cebu City Medical Center (CCMC).
Si Konsehal Mary Ann Delos Santos, chairman sa AdHoc Committee sa CCMC, mibutyag nga walo ka bidders ang nagpakita og interest sa nahisgutang proyekto.
Gibutyag ni Delos Santos nga ang Phase I mao ang structural nga una nga tukuron nga may gahin nga mokabat sa P315 milyones gikan sa lokal nga kagamhanan sa siyudad ug sa “Piso Mo Hospital Ko” project.
Hayan dili paigo ang maong gahin alang sa Phase I.
“We have agreed that the money we have recently now, we will just build the structural, so asa’y aboton sa structural amounting P315 million it’s only up to there. . .we have to be realistic and practical,” matud ni Delos Santos.
Matud ni Delos Santos nga posibleng sunod tuig adunay igahing budget alang sa CCMC.
Si Delos Santos malaumon nga sa tuig 2016 bisan og dili makompleto sa pagkahuman ang proyekto apan functional na kini. Gibutyag usab ni Delos Santos nga mokabat ngadto sa P1.5 bilyones ang kinatibuk-ang budget nga gikinahanglan alang sa katukuran sa CCMC. (BANAT NEWS)