Flag raising ceremony sa CCPO isibog og oras
CEBU, Philippines - Aron mabantayan ang siyudad sa sayo sa buntag ilabi na sa adlaw nga Lunes, ang hepe sa Cebu City Police Office (CCPO) nagplano pagbalhin sa oras sa flag raising ceremony gikan alas -8 sa buntag ug himuon kini sa mas sayo nga oras.
Si Senior Superintendent Noli Romana mibutyag sa mga tigbalita nga sa oras nga maghimo sa flag raising ceremony ang kapulisan "busy" na ang dakbayan sa Sugbo ug gikinahanglan nga duna nay mga polis diha sa kadalanan.
Matud ni Romana nga atol sa pag-ambush kang Jonathan Go, sagad sa mga polis mitambong sa flag raising ceremony.
Gipasabot ni Romana nga kini plano pa lang, apan sumala pa kini ilang tun-an alang sa pagpahugot pa sa seguridad sa dakbayan.
Apil sa mga plano sa opisyal nga himoon na lang ang flag raising ceremony sa alas-7 o alas- 6 sa buntag.
Samtang gitug-an ‘sab ni Romana nga apil siya sa mga nanawagan kaniadto pa nga dili na mga polis ang maglangkob sa banda sa kapulisan.
Kini tungod kay salikwaot paminawon nga adunay mga pulis nga dagko og mga ranggo apan wala magserbisyo sama sa usa ka polis tungod kay magsige lang og tukar og musika ang trabaho. (BANAT NEWS)
- Latest
