Ilegal parking dili mabangbang

CEBU, Philippines – Nagpadayon ang ilegal parking sa mga sakyanan diha sa mga aseras nga nakababag sa agianan sa mga tawo apan gipasagdan ra kini sa mga tinugyanan sa trapiko.

Human si Mayor Michael Rama miasumer sa katungdanan kaniadto’ng Hulyo 2010, wala na ipatuman sa dakbayan ang pagpangguyod sa mga sakyanan nga masakpan nga ipataka og parking sa lainlaing mga dapit.

Atol sa administrasyon ni kanhi mayor Tomas Osmeña tulo ka towing companies ang gi-hire sa dakbayan aron mosuroy ug mangguyod sa mga sakyanan nga ipataka lang og parking sa mga tag-iya diha sa mga aseras ug daplin sa karsada nga dili parking area.

Human giwagtang ang “towing” sa mga sakyanan, daghan na kaayong mga motorista nga magpataka na lang pagparking sa ilang mga sakyanan, sagad sa mga aseras nga bisan og aduna pay traffic signs nga “No Parking Anytime.”

Si Mayor Rama miingon nga samtang giundang ang towing operation apan padayon nga gipatuman sa CITOM ang pag-clamp sa mga sakyanan nga masakpan nga ipataka pagparada sa gidili nga lugar. (RUB) (BANAT NEWS)