CEBU, Philippines – Patay na nga nakit-an sa iyang inahan ang 25-anyos nga lalaki human giingong naghikog gamit ang pisi sa sitio Camparville, Buhisan, dakbayan sa Sugbo niadtong Domingo sa gabii. Ang nagpakamatay naila nga si Mark Anthony Godin, ulitawo, wala’y trabaho ug nagpuyo sa maong lugar.
Sa imbestigasyon sa homicide section sa Cebu City Police Office nga gipangulohan ni SPO4 Rey Cuyos ang inahan nga si Celestina ang unang nakabantay sa iyang anak nga nagbitay na. Gisuwayan pagluwas si Godin apan nakabsan na gyud sa iyang kinabuhi.
Nakuha sa kapolisan ang pisi nga gigamit ni Godin sa paghikog nga iyang gihikot sa beam sa ilang balay ug gihikot sa iyang liog.
Duda ang kapolisan nga wala’y foul play ang maong hitabo human gitug-an sa inahan nga dunay nervous breakdown ang iyang anak ug posibleng kini ang nagtukmod nga kini nagpakamatay. -/GMR) (BANAT NEWS)