CEBU, Philippines - Personal nga gihatod sa buhatan ni Sibonga Mayor Lionel Bacaltos sa mga representante sa Department of Interior and Local Government ang suspension order batok kaniya mahitungod sa pasangil nga pagpasira niini sa public tennis court ug pagpatangtang sa tennis net nga nakita sa Ombudsman of the Visayas nga usa ka simple misconduct.
Si Bise Mayor Rey Apuda kinsa mao karon ang milingkod nga acting mayor sa lungsod miingon nga nadawat nila ang maong order niadtong Lunes.
Kahinumduman nga niadtong Agosto 22, 2014 niluwat ang Ombudsman-Visayas og tulo ka buwang suspension nga way sweldo batok kang Bacaltos tungod sa reklamo kaniya sa mga miyembro sa tennis club sa ilang lungsod.
Niadtong Hunyo 2, 2013 mireklamo si Gerson Chan tungod sa pagpatangtang sa mga nets sa public tennis courts sa plaza sa lungsod.
Tungod niini misang-at og reklamo ngadto sa Ombudsman Tito Satera, ug kanhi mayor Nestor Ponce, Fabian Jose Teves, George Chan, Irvan Rizon, Gerson Chan ug Aurelio Amores nga ang gibuhat sa mayor kalapasan sa Republic Act 7160 Section 21.
Matud sa mga reklamante nga ang gibuhat sa mayor usa ka paghikaw sa katungod sa mga tawo nga gustong moduwa sa maong korte.
Apan sa counter-affidavit ni Bacaltos iyang gisaysay nga nakadawat siya og mga reklamo nga ang maong pampublikong korte exclusively used sa mga reklamante busa nakadesider siya nga ipasira lang usa ang maong korte.
Gihimakak usab ni Bacaltos ang pasangil nga nagtudlo siya og mga tawo nga mobarog isip maoy modumala sa maong korte.
Matud usab ni Bacaltos nga tungod sa mga kalihokan sa mga club members iyang gimando nga ablihan pagbalik ang maong korte.
Giingong gipasirad-an lamang ang maong korte dihang gigamit kini sa DepEd Provincial Meet sa miaging Hunyo 2013. (Khacel Anne Sanchez/EIM)(BANAT NEWS)