CEBU, Philippines - Nalandig sa tambalanan ang usa ka anak human gipusil sa iyang amahan niadtong Huwebes sa gabii sa sitio Sangi, Cabcaban, Barili.
Ang biktima naila nga si Jojo Cañete Acruz, 34, minyo, samtang ang suspek nga iyang amahan naila nga si Fernando Barciana Acruz, 63.
Sumala pa ni PO3 Elmer Opsima sa Barili Police nga hubog ang anak sa dihang nahitabo ang insidente.
Giingong gitambagan sa amahan ang iyang anak nga dili na unta maghuboghubog ug tigumon na lang ang kwarta aron ipalit og pagkaon, apan kalit lang nasuko ang anak.
Matud pa nga gibato sa anak ang balay sa iyang amahan hinungdan nga dali usab nakakuha og pugakhang ang amahan ug gipusil ang paa sa iyang anak.
Sa balay sa iyang amahan nagpuyo ang biktima kauban sa iyang tulo ka gagmay nga anak.
“Murag naa po’y punto ang amahan nga motambag kay didto man ni’ng anak nagpuyo sa iyahang balay, siya ra pud nagbuhi sa iyang mga apo,” sigun pa ni Opsima.
Didto sa presinto sa kapolisan nagsige og pangita ang tulo ka bata og hain na ang ilang lolo sumala pa ni Opsima.
Matud pa nagkasabot na ang mga igsoon nga dili na lang mopasaka og kaso batok sa ilang amahan. (Jojo C. Ugdol/GMR)(BANAT NEWS)