CEBU, Philippines – Wa pa gani mamatay ang isyu sa Capitol Security Chief nga si Loy Anthony Madrigal tali sa iyang sekretarya nag-atubang na ‘sab siya og laing kontrobersiya human ang iyang service vehicle nga isyu sa Kapitolyo nakasaghid og motorista sa dakbayan sa Bogo sa miaging gabii.
Apan base ni PO3 Edwin Dignos nga sa inisyal nga imbestigasyon ni PO3 George Ocina, traffic investigator sa Bogo City nga sa alas 8:20 sa miaging gabii nakasaghid ang sakyanan ni Madrigal.
Apan ang nagmaneho sa maong pick-up SJC 600 mao si Alberto Naraja, 45, taga Barangay Canagahan, San Remegio.
Samtang ang nabanggaan mao ang magtiayon nga sila si Felix Mirambel, 50, taga Taytayan, Bogo City, ug Marites Merambel, 43, nga luwan sa usa ka motor.
Sumala pa sa imbestigasyon, ang magtiayon gikan sa lungsod sa Medellin ug sa pag-abot sa highway sa Don Pedro sa Bogo City nasaghiran kini sa sakyanan nga giluwanan ni Loy.
Tungod sa kakusog sa impact sa pagbangga nakaangkon og grabeng kadaot sa ilang lawas ang magtiayon. Gidala sila sa Cebu Provincial Hospital sa Bogo apan gibalhin sa Vicente Sotto Memorial Medical Center diin matud pa namatay si Felix.
Matud pa ni Chief Insp. Germano Mallari, hepe sa Bogo City Police Station nga nahinabi sa CCTN kagahapon sa hapon nga gikan sa dakbayan sa Sugbo ang sakyanan ni Madrigal.Giingong nangangkon si Madrigal nga padung sila sa usa ka operasyon.
Wala gidakop ug gipaubos sa liquor test ang drayber ug wa usab gi-impound ang sakyanan ni Madrigal kay matud pa nagkasabot ang pamilya sa biktima.
Apan pipila ka oras sa wala pa mahitabo ang panagbangga nagpa-blotter pa si Madrigal sa San Remigio Police Station tungod kay dunay duha ka tawo nga nagsakay og motor nga armado nga mihunong dapit sa ilang balay sa Kanagahan.
Kagahapon, ang mga grupo sa mangingisda nagpiket sa Kapitolyo aron sa pagpakita sa ilang suporta kang Madrigal, kinsa mao usab ang hepe sa enforcement team sa Anti-illegal Fishing Task Force sa Kapitolyo.
Emosyonal nga miatubang kagahapon sa iyang mga suporter ug miangkong natandog gyud siya sa gipakitang pagsalig kaniya. Si Madrigal mi-file og 20 ka adlaw nga leave aron makahuygo ang imbestigasyon batok kaniya. “I need a break from all these things. I am battered already. I have to relax. I am also giving everybody a break para pud maka-concentrate sila sa investigation,” matud niya.
Nagdumili na usab pagkomento si Madrigal bahin sa pagtumaw sa bana sa iyang sekretarya apan misaad siyang ipadayon niya ang kiha nga libelo kang Medellin Mayor Ricky Ramirez. -/EIM) (BANAT NEWS)