Mga arkitek nag-mural painting sa Mandaue

CEBU, Philippines – Ang United Architects sa Barangay Subangdaku, Dakbayan sa Mandaue mipahigayon usab og mural painting sa mga koral ug bungbong nga semento sa pagdugang pa sa katahom sa palibot niini.

Si Roger Paller nga maoy public information officer (PIO) sa kagamhanan sa maong dakbayan nga nahinabi sa Banat News miingon nga ang gihimong mural painting sa maong grupo sa mga architect sa Barangay Subangdaku maoy pagpadayon sa nasugdan na sa maong dapit  ni AG Sano nga usa ka international mural artist.

Matud pa ni Paller nga nagdala gihapon og mensahe sa pagpanalipod ug pagpreserbar sa kalikopan ang gipamintal sa grupo sa mga architects sa nahisgotang dapit nga naglakip sa mga kahoy, nagkadaiyang matang sa isda sa kadagatan, mga langgam ug uban pa.

Dugang pa ni Paller nga ang pagpatahom sa kadalanan sa maong lugar pinaagi sa pagpamintal maoy kabahin sa gihingusgang kampanya sa kagamhanan sa maong dakbayan labot sa paghugawhugaw nga pagahimoon sa mga batan-on panahon sa kagabhion.

Kaninumdoman nga si AG Sano sa miaging bulan niining tuiga maoy unang naghimo og mural painting sa mga koral ug bungbong nga semento sa pipila ka mga sitio sa Barangay Subangdaku.

Naghimo usab kini og mural paintings sa Barangay  Alang-Alang sa maong dakbayan ug ingon man sa Barangay National Shrine of Saint Joseph sa Barangay Centro sa maong dakbayan. -/EIM) (BANAT NEWS)