Nadugta nga lawas wa pa gihapon mailhi

CEBU, Philippines – Hangtod karon wa pa gihapon mailhi ang usa ka lalaki nga nadiskobrehan nga patay sulod sa usa ka langob ug paingon na sa pagkadugta ang lawas diha sa Sitio Dapdap, DAS, Toledo City, niadtong nakalabay nga adlaw.

Gitug-an ni PO1 Jonathan Cuizon sa Toledo Police nga nahinabi sa Banat News nga usa ka Andy Padilla, caretaker sa usa ka manokan sa maong lugar ang nakadiskubre sa lawas tungod sa  kabaho sa maong lugar.

Sa gihimo nga pakisusi sa kapulisan nasayran nga anaa sa 40 hangtod 50 anyos ang pangidaron sa maong patay nga lawas, 5’8 ang gitas-on, nagsuot og puti nga kalo, duna’y sun glasses, puti nga long sleeve, puti ‘sab nga pantalon ug nagsuot og sapatos kolor gray nga duna’y tatak nga “JHS.”

Sa crime scene nakuha ‘sab ang usa ka buhi nga bala sa caliber .38 ug usa ‘sab ka basiyo niini sa tuo nga kamot sa patay nga lawas.

Gitino pa sa kapulisan kung gipusil ba ang maong lalaki gumikan kay wala pa sab muabot ang resulta sa pag-autopsy sa maong patay nga lawas.

Nanawagan ang kapulisan sa tawong nawad-an og sakop sa pamilya nga muhaom sa maong paghulagway nga makig-alayon  sa ilang buhatan aron sa posibling pag-ila sa maong patay nga lawas. -/EIM) (BANAT NEWS)