CEBU, Philippines - Mikunhod og gamay ang koleksyon sa City Traffic Operations Management (CITOM) kaniadtong bulan sa Hulyo kon itandi sa sama nga bulan sa miaging tuig.
Si Sofia Bacolod, hepe sa Traffic Violations Bureau sa CITOM, mibutyag nga kaniadtong Hulyo 2013 mikolekta sila og P5,953,945 apan sa Hulyo karong tuiga miabot lang og P5,768,680 ang ilang koleksyon.
Kon tandion ang koleksyon sa Hulyo ug Hunyo karong tuiga, nabentahaan pa gihapon ang Hulyo kay miabot lang og P5,768,680 ang nakolekta kon itandi sa P5,782,222 sa Hunyo.
Base sa report ni Bacolod nga miabot sa City Hall, kapin lang sa P1.4 milyones ang nakolekta gikan sa mga multa sa madakpan nga drayber nga katunga ra sa koleksyon gikan sa parking fee nga miabot og P3.1 milyones.
Ang CITOM adunay kapin sa 200 ka traffic enforcers apan nabantayan nga dili kaayo manakop sa mga drayber nga makahimo og kalapasan sa mga lagda sa tukma nga pagmaneho og sakyanan.
Nabantayan usab nga samtang puwerte’ng daghana nga sakyanan nga magbuga og itom nga aso sa iyang tambutso apan ang CITOM mikolekta lang og P3,500 gikan sa kampanya sa smoke belching.
Samtang daghan kaayo nga mga sakyanan nga ipataka lang pagparada daplin sa karsada, ilabi na sa gabii ngadto sa kaadlawon, apan miabot lang og P15,250 ang nakolekta sa CITOM sa bulan sa Hulyo.
Makita nga ang koleksyon sa CITOM gikan sa bayad sa mga tag-iya og sakyanan nga moparada sa mga parking pay daplin sa karsada mao ra ang ilang gisaligan. Kaniadtong Hunyo ang CITOM mikolekta og P3.2 milyones ug pagka Hulyo mikolekta na lang ang CITOM og P3.1 milyones gikan sa parking fees. (RUB) (BANAT NEWS)