Tulo ka kanhi trs chiefs pakasohan g’yud

CEBU, Philippines - Girekomendar sa Investigation and Detection Management Branch sa Cebu City Police Office nga pasakaan og kasong administratiba ang tulo ka kanhi hepe sa Theft and Robbery Section tungod sa paggamit nila sa usa ka impounded nga sakyanan samtang hepe pa sila sa maong buhatan.

Si Chief Insp. Aileen Recla ang hepe sa IDMB, miingon nga ilang irekomendar nga pasakaan og kaso ang maong mga hepe tungod kay nakalapas sila sa external operating procedure 2013-001.

Ang maong order naglatid nga i-turnover g’yud sa labing duol nga buhatan sa Highway Patrol Group ang mga narekober nga abandonado o kinarnap nga mga sakyanan sulod sa 48-oras.

Sumala pa ni Recla nga tukma alang sa maong kalapasan ang kasong less grave neglect of duty batok nila ni Chief Inspector Noli Cernio, Senior Inspector Elisandro Quijano ug ni Inspector William Alicaba.

Matud pa ni Recla nga ang maong kalapasan ubos sa National Police Commission Order 2007-001 nga nagtangag og silot nga di momenos sa 31 ka adlaw nga pagkasuspenso apan di molapas sa 60 ka adlaw.

Matud pa ni Recla nga nakita sa ilang imbestigasyon nga nalapas sa tulo ang SOP sa kapolisan. Sa kaso ni Cernio matud pa ni Recla nga wala may mi-execute og affidavit nga gidala g’yud niya ang maong sakyanan.

Apan nakita lang sa iyang affidavit nga naabot sa Punta Police Station ang maong sakyanan tungod kay didto gihatod sa nag-ayo niini. 

Sumala pa ni Recla nga naa na karon sa Regional Investigation and Detection Management Division ang maong kaso ug naghuwat na lang sila sa ilang desisyon niini. (BANAT NEWS)