CEBU, Philippines - Mga tulisan miatake na usab ug ning tungora mas ngilngig ang ilang gibuhat human mipatay na g’yud sila og gwardiya sa tindahan og mga pampagwapa dihang misukol kini sa tulisan diha sa N. Bacalso Avenue sa Barangay Tabunok, Talisay City kagahapon.
Ang namatay nga gwardiya mao si Ramil Buno, 44, magbalantay sa Avon Product and Cosmetics sa Tabunok sukad pa niadtong 2002. Si Buno nakaangkon og duha ka samad pinusilan sa iyang ulo ug lawas.
Si Danny Lopena, usa sa mga franchise owner sa maong establisamento mipakita sa mga polis sa kopya sa closed-circuit television (CCTV) nga nagpakita sa duha ka mga tulisan nga misud sa tindahan ala 1:55 sa hapon. Nakita sa footage ang usa ka tulisan nga nagsuot og itom nga jacket, pantalon ug cap maoy unang misulod, paglabay og usa ka minuto, misulod ang ikaduhang tulisan nga nagsuot og puti nga t-shirt, shorts ug itom nga cap ug migawas usab dayon nga daw nagsilbing look-out.
Ang pagpamusil nahitabo alas 2:03 o walo ka minutos gikan sa pagsud sa mga tulisan.
Usa sa mga tindera mibutyag nga mi-order pa og eyeliner ang tulisan.
"Ako ang nag-entertain niya kay mi-order man siya og eyeliner. Dili man ko makatuo nga tulisan kay gwapo ug nindot man siya og barog," matud pa niini sa mga tigbalita.
Nakurat na lang siya dihang gitirahan sa maong kustomer og “taser gun” ang ilang gwardiya. "Wala lang g’yud abti og pila ka minutos kay naka-notice man ko nga gipakuryentehan niya si chief (Buno) unya nagkirigkirig na siya," matud niini. Apan giingong bisan nakuryentihan, nakahimo pag-ibot si Buno sa iyang armas apan gidoblahan kini pagpusil sa tulisan diha sa ulo ug lawas.
Diha-diha migawas dayon ang tulisan ug miikyas lakip na ang lookout niini nga way nadala, way nakakita kun unsay gisakyan sa mga tulisan.
Si Superintendent Reycel Carmelo Dayon, hepe sa Talisay City police miingon nga paninguhaon nilang mailhan ang mga tulisan, apan nagtuo siyang dili local boys ang duha.
Sumala pa ni Dayon nakadawat sila og impormasyon nga dunay mahitabong tulis sa siyudad karong semanaha mao nga gihingusgan nila ang pagpatrolya, gani bag-ohay pa lang g’yud milabay sa dapit ang roving patrol. Si Talisay City Mayor Johnny De los Reyes ug City Councilor Danilo Caballero miadto dayon sa crime scene ug mitan-aw sa CCTV footage.
"Ato makita nga wala man g’yud matarong og plastar ang CCTV camera. If natarung siguro og butang, maklaro g’yud siguro ang mga nawong sa suspetsado unya ang CCTV camera sa sulod wala pud nagtutok sa mga tao nga misulod kun dili tutok ra ngadto sa mga display sa maong tindahan," sumala pa sa mayor. (BANAT NEWS)