“Sex workers” naluwas

CEBU, Philippines - Kinse ka mga babayeng giingong commercial sex workers ug usa ka bayot ang naluwas sa kapolisan sa dakbayan sa Sugbo sa miaging gabii sa may Juana Osmeña ug sa Mango Avenue.

Ang hepe sa City Intelligence Branch sa Cebu City Police Office nga si Superintendent Romeo Santander nahinabi sa Banat News miingon nga nakadawat sila og reklamo sa mga langyaw ug mga tag-iya sa mga establisamento sa maong lugar bahin sa mga babayeng mamiktima kanila.

Samtang ang mga negosyante mireklamo nga nahimong ‘cheap’ ang ilang lugar tungod sa presensya sa maong mga babaye nga anha magladlad sa kadalanan aron mangatang og kustomer.

Dugang ni Santander nga wala na silay naabtan nga bugaw atol sa maong rescue operation apan dunay uban nga nakadagan.

Human sa ilang gipahigayon nga profiling kanila, nasuta nga ang uban kanila nagbalik-balik na nila og kasikop sa nangaging mga operasyon.

Giingong ibaligya sa maong mga babaye ang ilang lawas sa kantidad nga P1, 500 ngadto sa P2, 500 ug sagad pick-apon lang sila og taxi ug dad-on ngadto sa mga motel.

Sagad kanila gikan sa Barangay Kamagayan ug mibalhin lang og pwesto kay wala na silay kustomer sa maong lugar.

Giturn-over gilayon ang mga babaye sa focal person sa Gender Awareness and Development of Barangay Kamputhaw.

Ang maong mga babaye namalhin sa ilang operasyon human nga gibungkag ang kabalayan sa Kamagayan diin sila sagad magladlad ini og kagabii.

Matud ni City Administrator Lucelle Mercado nga ngitngit ang dalan sa bag-o karong giestambayan sa maong mga babaye hinungdan nga pabutangan niya kini og suga.

Ang lapad na nga bahin sa Barangay Kamagayan gipangguba ang kabalayan aron   sukdon pagbalik ug ang mga lumolupyo katugotan nga makatarok pagbalik sa ilang kabalayan. (BANAT NEWS)