CEBU, Philippines – Napalgan kagahapon ang lawas sa tulo ka estudyante nga naanod sa kusog nga baha niadtong Lunes sa hapon didto sa lungsod sa Argao.
Kini atol sa gihimong search and retrieval operations sa Local Disaster Risk Reduction and Management Office sa Argao, uban sa miyembro sa DRRMO sa probinsya sa Sugbo ug kapolisan, kagahapon sa buntag.
Ang maong mga bata nailhan nga sila si Caroline Marson, 15, Ritchelle Pasaje, 15, pulos taga-Barangay Canbantog ug si Earl Kyle Sarbido, 13, taga-barangay Linut-od.
Matud sa LDRRM officer sa Argao nga si Vip Semilla nga nahinabi sa Banat News napalgan ang patay’ng lawas ni Pasaje mga alas-6 kapin na sa buntag, kapin 20 ka kilometro gikan sa spillway nga gitabukan sa mga estudyante.
Napalgan usab ang lawas ni Sarbido mga alas-10 sa buntag ug si Marson paglabay sa usa ka oras nga parehong naglutaw na sa lawod nga bahin sa dagat.Si Semilla usab nagkanayon nga pito ka estudyante ang nagkuyog nga mitabok sa spillway apan ang tulo maoy naabtan sa kalit nga pagbaha. Si Mayor Edsel Galeos buot nga ipaubos sa stress debriefing ang upat ka mga kauban sa mga bata nga naluwas pinaagi sa Social Welfare Development sa lungsod. Mohatag usab ang lungsod ug ang probinsya og tabang ngadto sa mga hingtungdan.
Samtang si DepEd Provincial Schools Division Superintendent Arden Monisit mopadala og legal team sa Argao aron susihon kon dunay lapso ang prinsipal ug mga magtutudlo sa Calagasan National High School kon nganong gitugotang makauli ang mga bata nga wala’y kaubang hamtong.
Matud pang Monisit, ang tanang mga principal, mga magtutudlo nasayod sa protocol sa DepEd kalabot sa seguridad ug kaluwasan sa mga estudyante ilabi na kon dunay dautang panahon ug mga kalamidad. Sugod palang sa klase, gihingusgan nang daan ang kaluwasan sa mga bata panahon sa kalamidad. (The Freeman/EIM) (BANAT NEWS)