CEBU, Philippines – Nasikop sa mga sakop sa Regional Anti-Illegal Drugs Special Operations Task Group (RAIDSOTG) 7 ang usa ka lalaki nga gituohang level 2 drug pusher ug drug den operator nga nakuhaan og dul-an sa P300 mil nga gituohang shabu ug laing tulo ka lalaki sa buy-bust operation kagahapon sa buntag sa Tabok, Barangay Pit-os sa dakbayan sa Sugbo.
Ang subject sa maong buy-bust operation naila nga si Dante Gerona, 27, nasikop ‘sab sila si John Steven Villarta, 22, Harry Gerona, 29 ug si Joey Pepito, 36, nga molupyo sa nahisgotang lugar.
Si Inspector Joey Bicoy nga nahinabi sa Banat News miingon nga ang mga residente sa maong dapit maoy misumbong sa kapolisan kabahin sa illegal nga negosyo ni Gerona.
Matud pa ni Bicoy nga naaktohan pa nila si Gerona ug Villarta nga nag-repack pa og gituohang shabu sa payag-payag sa maong lugar.
Dugang ni Bicoy nga ang duha nakuhaan ‘sab nila og drugas ug drug paraphernalia hinungdan nga gisikop nila kini.
Si Bicoy mibutyag nga ang operasyon sa suspetsado nikatap hangtod sa silingang mga lungsod apan ang konsentrasyon sa operasyon niini na sa bukirang mga barangay.
Dunay usa ka payag duol sa balay ni Gerona nga gihimong suyopanan sa mga adik.
Ang mga suspek nga nahinabi sa Banat News miingon nga wala sila’y kalabotan sa maong pamasangil ug matud pa ni Gerona nga dili siya pusher ug nataymingan lang nga naa siya sa dapit dihang nag-raid ang kapolisan. -/EIM) (BANAT NEWS)