Nagsugal gipusil, laing siyam nadakpan

CEBU, Philippines – Kritikal ang kahimtang sa usa ka tawo nga kalit lang gipusil samtang nagduwa og tong-its sa dalan F. Ralota, Poblacion, dakbayan sa Danao alas 5 pasado kagahapon sa buntag.

Si SPO3 Ildefonso Prosia sa Danao Police Station miila sa biktima nga si Lynel Baroa, 35, taga Guinsay sa maong dakbayan ug wala mailhi ang namusil kinsa daling nakasibat pahilayo sa lugar.

Ang biktima nga naigo sa iyang tiyan ug milapos ang bala sa luyong bahin sa lawas ang daling gidala sa Danao District Hospital apan gibalhin sa Vicente Sotto Memorial Medical Center sa dakbayan sa Sugbo.

Si Prosia miingon nga ang mga kauban sa tong-its sa biktima pulos mipadayag nga wala sila makaila sa lalaki nga kalit lang namusil.

Samtang wala naka-ugpo ang siyam ka tawo nga nagduwa usab og hantak dihang kalit lang gironda sa kapolisan sa sitio First Batch, Pulpogan, lungsod sa Consolacion ala 2 pasado ang takna kagahapon sa kadlawon ug usa kanila ang nasakmitan og ilegal nga drugas.

Si SPO2 Aldin Abay-abay sa Consolacion Police Station miila sa nadakpan ug nasakmitan og duha ka gagmay’ng paketeng shabu ug drugs paraphernalia nga si Efren Catinggan, nagpuyo sa maong dapit.

Ang laing nadakpan mao sila si Brandon Diaz, taga Pulpogan; Rey Abao, Robert Sinajon, taga Deca Homes, Casili, Consolacion, Edgar Pilapil, 33, taga Landing, Liloan; Venerando Cabahug, Genio Florentino ug Early Jay Serrano.

Si Abay-abay miingon nga mireklamo ang pipila ka mga molupyo sa First Batch tungod sa kasaba sa pagsinggit sa mga tawo nga naghantak sa maong dapit.

Kini ang hinungdan nga ilang gisusi ang dapit ug miresulta sa pagkasikop sa mga sugarol. -/GMR) (BANAT NEWS)