CEBU, Philippines – Apektado ang lima ka barangay sa dakbayan sa Sugbo sa ipahigayong traffic rerouting alang sa prosesyon sa kapiyestahan ni San Nicolas de Tolentino karong Martes sa hapon.
Si Joy Tumulak, City Traffic Operations Management (CITOM) operation head, mibutyag nga ang apektado mao ang barangay Sawang Calero, Suba, Pahina San Nicolas, San Nicolas Proper ug Duljo Fatima.
Matud ni Tumulak nga ang prosesyon magsugod alas 4:00 sa hapon apan ang mga karsada nga agian siradohon sa alas 3:00 sa hapon karong Martes.
Gibutyag ni Tumulak nga 14 ka karo ang mosalmot sa prosesyon ug gibana-banang upat ngadto sa lima ka kilometro ang gilay-on sa rota niini.
Ang N. Bacalso Avenue ug SRP coastal road gilaumang maghuot apan ang mga karsada diin molabay na ang prosesyon ablihon dayon kini aron moluag ang trapiko.
Ang mga public utility jeepneys (PUJ) nga gikan sa Lahug, Guadalupe ug Banawa nga moagi sa V. Rama extension moliko paingon sa Tres de Abril, Lakandula, B. Aranas, liko sa tuo ngadto sa Tres de Abril, C. Padilla dayon sa ilang naandang rota paingon sa Carbon Area ug sa ilang gigikanan.
Ang PUJ nga gikan sa Labangon nga moagi sa Tres de Abril moliko sa N. Bacalso Avenue, Leon Kilat dayon ngadto sa ilang naandang rota ug gigikanan.
Ang PUJ nga gikan sa Alumnos, Pardo, Bulacao ug Inayawan nga moagi sa C. Padilla nga molabay sa Tagunol moliko sa wala ngadto sa N. Bacalso Extension, liko sa tuo sa N. Bacalso Avenue (kilid flyover sa Mambaling), liko sa Leon Kilat/Junquera dayon ngadto sa ilang naandang rota ug gigikanan.
Ang PUJ nga gikan sa Carbon Area ug paingon balik sa ilang gigikanan ang moagi diha sa C. Padilla ug Tupas ang i-reroute.
Samtang ang magbiyahe sa dalan Colon ug Magallanes moagi sa Borromeo, liko sa wala sa Sanciangko deretso Tres de Abril o moliko sa tuo ngadto sa Panganiban, ngadto sa N. Bacalso dayon sa ilang gigikanan. - /GMR) (BANAT NEWS)