Kontraktor wa mananghid sa Mayor
CEBU, Philippines – Gibadlong ni Talisay City Mayor Johnny Delos Reyes ang usa ka pribadong kontraktor nga miguba sa concrete road separator sa may Bulacao.
Kini human wala makapakita og permit ang mga tawo nga niguba sa maong istruktura nga gibutang aron mapahapsay ang dagan sa trapiko. Matud ni City Administrator John Yre Delos Reyes nga ang nakapa-iknat sa kilay sa iyang amahan mao ang pangangkon sa mga tawo nga gitugutan sila sa konseho pinaagi sa resolusyon ug sa Department of Public Works and Highways nga moguba sa maong butang.
Nunot niini, sumala pa ni John Yre nga gitanggong una nila ang mini-dumptruck nga gigamit samtang ilang ilhon ang maong kontraktor karong adlawa ug susihon ang mga papel nga giingong permit gikan sa konseho ug sa DPWH.
Giklaro ni John Yre nga ang sakto unta mao nga ang konseho ang mohatag og katungod sa mayor sa pagpahatag og permit. Matud sa tigpamaba sa Talisay City Hall, Vince Monterde, nga si Konsehal Raul Cabañero, ang pangulo sa Association of Barangay Council (ABC) nga taga Bulacao, ang nikompirmar sa maong resolusyon sa konseho. (BANAT NEWS)
- Latest
