CEBU, Philippines – Patay ang usa ka lalaki human kini gidunggab sa makadaghang higayon sa usa ka 62-anyos nga lolo sa miaging hapon sa merkado sa lungsod sa Dalaguete.
Ang biktima naila nga si Celestino Omnus, 48, taga Sitio Solong-on, Barangay Tapon sa lungsod sa Dalaguete.
Ang suspetsado naila nga si Bernardino Umali, taga Barangay Saksak sa nahisgotan nga lungsod. Base sa imbestigasyon sa kapolisan nga ang suspetsado ug ang biktima nagkalalis sa sulod sa merkado publiko sa maong lungsod.
Matud pa nga tungod sa ilang panaglalis ang suspetsado mikuha og kutsilyo ug dayong hansak ngadto sa biktima sa iyang tiyan sa pipila ka higayon.
Daling gidala ang biktima sa Julio Cardinal Rosales Memorial Hospital aron matambalan.
Apan tungod sa grabing samad nga naangkon sa biktima gi-refer kini ngadto sa South General Hospital apan gideklarar na kini nga patay na dihang nahidangat sa maong tambalanan.
Ang suspetsado dali usab nga nadakpan sa kapolisan nga nagdala pa sa kutsilyo nga nagkadugo pa nga gituohang gigamit niini sa maong krimen.
Samtang nalandig sa tambalanan ang usa ka lalaki nga mibadlong lang sa usa ka pundok sa mga lalaking nagsaba-saba samtang nagpadayon ang usa ka Santos nga Misa sa Barangay Kawasan, Aloguinsan alang sa ilang kapistahan sa miaging adlaw.
Ang nalandig naila nga si Necomedes Naviada, 34, molupyo sa maong dapit samtang ang nakadunggab kaniya naila nga si Radolfo Ragodos, nga molupyo sab sa maong dapit ug gidakop usab ang anak niini nga si Richard human nakuhaan og kalibre .38.
Matud pa pwerteng sabaa sa grupo sa mga suspek bisan dunay nagsimba hinungdan nga gibadlong kini ni Naviada, apan nasuko naman hinuon si Ragodos ug gihansakan kini. Ang manag-amahan anha na namista sa prisohan. - /EIM) (BANAT NEWS)