CEBU, Philippines - Ang hepe sa Traffic Enforcement Agency of Mandaue (TEAM) nga si Edwin Ermac mipasabot nga ang pag-usab sa agianan sa mga PUJ sa dakbayan sa Mandaue gitumong aron mohapsay ang kadalanan sa siyudad.
Ang katin-awan ni Ermac gihimo atol sa panagtigom sa mga drayber ug operator nga sakop sa Pinagkakaisang Samahan ng mga Tsuper at Operator’s Nationwide (PISTON) nga gipangulohan ni Greg Perez. Matud ni Ermac nga ang pag-usab sa rota nga agian sa mga PUJ maglakip na sa mga karsada sa Ibabao-Estancia ug Ouano.
Giangkon ni Ermac nga bisan og nausab na ang rota nga paagian sa mga PUJ apan masinati gihapon ang kahuot sa mga sakyanan sa kadalanan kay nagpadayon pa man ang pagsemento ug pagbutang og dagko nga imbornal nga gihimo sa Department of Public Works and Highways (DPWH) 7.
Laing tumong sa pag-usab sa rota mao ang pagpasulod og mga sakyanang pasaheroan ngadto sa mga bag-ong balay-patigayon nga gitukod sa nagkadaiya nga lugar sa dakbayan.
Kini maoy hinungdan nga ang mga traysikol ra ang gitugotan nga makalahos ngadto sa merkado publiko sa Sitio Tribunal sa Barangay Centro sa paghatag og kasayon sa mga pumapalit.
Gitataw ni Ermac nga dili hinuon pinugsanay ang pagpasulod sa mga traysikol ngadto sa merkado publiko tungod kay makahimo na man kini sa paglahos na sa barangay nga maoy naandan nila nga rota.
Si Ermac nga kanhi opisyal sa kapolisan mibutyag nga estrikto sila sa TEAM nga mipatuman sa mga lagda sa trapiko apan iyang gitataw nga ang tumong niini mao ra g’yud ang paghapsay sa dagan sa sakyanan.
Dili lang ang mga drayber ug operator ang mireklamo sa pag-usab sa mga rota sa PUJ ug mga traysikol kundili mireklamo usab diay ang mga kawani sa City Hall. (BANAT NEWS)