Vendors sa Minglanilla giabog, pari apil sa gidakop

CEBU, Philippines – Di mominus singkwenta ka mga pulis gikan sa Regional Public Safety Battalion (RPSB-7) ang gigamit aron pag-abog sa mga manindahay sa karaang merkado sa lungsod sa Minglanilla kagahapon sa kaadlawon.

Apan dunay tensyon nga nahitabo hinungdan nga hapit mag-usa ka oras una nakasulod ang kapulisan sa karaang merkado dihang ilahang gigabas ang padlock sa pultahan niini.

Nasayran nga unom ka tawo ang gidakop sa kapulisan diin usa na niini ang presidente sa kahugpongan sa mga vendors nga si Sherbie Delos Reyes ug ang usa ka pari nga si Father Peter Simon Francis Jardinico tungod sa giingong pagbabag nila sa mga pulis  pagsulod sa merkado.

Ang hepe sa Minglanilla Police Station Senior Inspector Richard Gadingan miingon nga milapas na ang adlaw nga gitagal sa mga nagmagahing  vendors base  sa notice to vacate gikan sa korte nga penetsahan niadtong Agosto 28 nga nagtugot sa mga manindahay sud lang sa lima ka adlaw.

Matud pa ilahang gihatagan og kopya ang mga manindahay sa notice to vacate apan giingong gipangkumot ra kini.

Si Gadingan miingon nga igo lang sila mituman sa ilang trabaho ug iyang giklaro nga wala sila’y gipasakitan ug gilapas nga tawhanong katungod sa mga vendors.

Apan ang presidente sa mga manindahay nga si Delos Reyes mihimakak nga gihatagan sila’g kopya sa notisya kay gipapilit lang kini sa mga polis diha sa bungbong.

Giklaro usab niya nga dili gikan sa korte ang notisya tungod kay pinirmahan ra kini sa abogado sa lungsod.

Gipahibawo usab niini nga nakadawat sila niadtong Miyerkules og suwat gikan sa Visayas Ombudsman nga matud pa pending ang maong kaso human sila miapelar.

Samtang tun-an pa sa kapulisan kon unsa nga kaso ang ilang ipasaka batok sa unom nga gidakop apil na niini si Delos Reyes ug ang pari.  - /EIM (BANAT NEWS)