CEBU, Philippines - Babaye nga buwag sa bana naghikog human mangayo’g pasaylo ngadto sa iyang boyfriend nga siya nagpakamatay.
Nadiskobrehan sa kapolisan nga si Catherine Alfornon, 33, mipadala pa og text message sa lalaki nga iyang gikarelasyon ug nangayo’g pasaylo sa iyang pagpakamatay didto sa Barangay Buanoy, Balamban.
Napalgan ang patay’ng lawas ni Alfornon nga nagbitay na sa sulod sa iyang balay ug may pisi nga gihigot sa iyang liog. Taud-taud na nga panahon nga si Alfornon nagkabuwag ug ang iyang bana.
Si PO2 Donard Pitogo sa Balamban Police Station nagkanayon nga gisubli-subli ni Alfornon ang pagpangayo’g pasaylo ngadto sa lalaki nga iyang gikarelasyon pinaagi sa text message. Wala g’yud masuta ang rason ngano nga nakahukom si Alfornon maghikog. Ang iyang panday maoy una nga nakadiskobre sa patay’ng lawas ni Alfornon kagahapon. (BANAT NEWS)